İlya Çavçavadze prospekti. Tbilisinin əsas mərkəzi küçələrindən biri. Böyük ədibimiz, görkəmli ictimai xadimimiz Cəlil Məmmədquluzadə “Molla Nəsrəddin” jurnalının adını məhz bu küçədə gəzərkən tapıb. Dramaturqun ömür-gün yoldaşı, ən yaxın silahdaşı Həmidə xanım Cavanşir xatirələrində Mirzə Cəlilin bu kəşfinin tarixçəsi barədə belə yazıb:
“Mirzə Cəlil mənə danışmışdı ki, satirik bir jurnal nəşr etməyin vacibliyi haqqında çoxdan düşünürmüş, ancaq xəyal etdiyi bu jurnala heç cür uyğun ad tapmır və daim bu fikri götür-qoy edirmiş. Bir dəfə Tsxneti küçəsində gəzəndə birdən-birə ağlına “Molla Nəsrəddin” gəlir. Mirzə Cəlil bu kəşfinə çox sevinir və fikirləşir ki, jurnal üçün bundan yaxşı ad tapa bilməz”.
Tsxneti İlya Çavçavadze prospektinin keçmiş adıdır. Prospekt 1867-ci ildən 1957-ci ilədək bu adı daşıyıb. 1957-ci ildə İ.Çavçavadzenin (1837-1907) anadan olmasının 120 illiyi və vəfatının 50 illiyi ilə əlaqədar prospektə görkəmli gürcü yazıçı və ictimai xadimin adı verilib.
