Bu il “Romeo mənim qonşumdur” filminin (1964) premyerasından 60 il ötür. Bəstəkar Rauf Hacıyevin eyniadlı operettasının əsasında rejissor Şamil Mahmudbəyovun çəkdiyi ekran əsərində əsas rollarda gürcü aktyorlar da yer alıb.
Musiqili komediya filmində Arif rolunda Gürcüstan SSR-in Əməkdar artisti İrakli Xizanişvili, Nona rolunda Gürcüstan SSR-in Xalq artisti Ariadna Şengelaya, Kolumb rolunda Gürcüstan SSR-in Xalq artisti İppolit Xviçiya çəkilib.
Aziz.ge oxucularına Azərbaycan filmində rol almış gürcü aktyorlardan ilk olaraq İrakli Xizanişvilinin həyat və yaradıcılığı haqqında geniş məlumat təqdim edir.
İ.Xizanişvili 1940-cı ilin iyulun 30-da anadan olub. 1966-cı ildə Ümumrusiya Dövlət Kinematoqrafiya İnstitutunu bitirib. Ali məktəbi bitirəndən sonra Moskva Dövlət Kinoaktyor Teatrında və “Gürcüstan film” kinostudiyasının nəzdində Tbilisi Kinoaktyor Teatrında işləyib.
Aktyorun kinoda debüt rolu məhz “Romeo mənim qonşumdur” filmində olub. Sovet dövründə bir sıra filmlərdə əsasən kiçik rollarda çəkilib.
İ.Xizanişvilinin kinoda ən tanınan işi 1972-ci ildə çəkilmiş rejisoru Stanislav Qovoruxin olan “Robinzon Kruzonun həyatı və qəribə macəraları” filmində olub. Aktyor ekran əsərində Pyatnitsa obrazını yaradıb. Gürcüstanın Əməkdar artisti adına 1980-ci ildə layiq görülüb.
1989-cu illərdə “Qara şahzadə Acuba” sovet-hind nağıl-filmində Ansari rolunda çəkilib. Uzun illər Rusiyada yaşayıb, 1970-ci illərin sonlarında Gürcüstana qayıdıb, burada əsas və böyük rollara dəvətlər alıb. Gürcüstan kinosunda son işi “Yalnız ölüm mütləq gəlir” (1992) filmində olub.
İ.Xizanişvilinin həyat yoldaşı kino və teatr aktrisası Olqa Qobzeva olub. Onlar tələbəlik illərində tanış olublar, nikahda 10 il yaşayıblar. Cütlüyün övladı olmayıb. 90-cı illərdə O.Qobzeva aktyor karyerasına son qoyaraq rahibə olmağı seçib.
İ.Xizanişvili 1993-cü ildə ABŞ-yə mühacirət edib. Onun Amerikada hansı işlə məşğul olduğu məlum deyil.
2021-ci ilin noyabrında Gürcüstan mediasında aktyorun sabiq prezident Mixeil Saakaşviliyə ünvanladığı müraciət dərc olunub. O, müraciətində həbsdə olan keçmiş dövlət başçısına dəstəyini ifadə edib.
Həmçinin oxu:
