Bu gün Azərbaycan aşıq sənətinin görkəmli nümayəndəsi, Borçalının ən tanınmış aşıqlarından biri Hüseyn Saraçlının (1916-1987) anım günüdür. Gürcüstanın Əməkdar mədəniyyət xadiminin vəfatından 37 il ötür.
Aşıq dinləyicilərinin rəğbətini gənclik illərindən şeirləri, mahnıları və sazda özünəməxsus ifa manerası ilə qazanıb. Ömrünün sonunadək o, Gürcüstanda və onun hüdudları kənarında aşıq sənətinin yorulmaz təbliğatçısı olub.
Ustad aşığın Gürcüstanda xatirəsi əbədiləşdirilib. 1996-cı ildə onun doğulduğu Bolnisi rayonunun Saraçlı (Mamxuti) kəndinin mərkəzində büstü ucaldılıb. Abidə Azərbaycan Rəssamlar İttifaqının hədiyyəsi olub. 1987-ci ildən etibarən aprel ayının ikinci şənbə günündə Saraçlıda aşığın ənənəvi xatirə günü keçirilir, kənddəki məzarı ziyarət olunur.
Saraçlı sakinləri həmyerliləri olan görkəmli saz-söz ustadının evinin muzeyə çevrilməsini arzulayırlar. Bu, Gürcüstanın azərbaycanlı icmasının da istəyidir.
İllərdir ki, H.Saraçlının evinin ümumi vəziyyəti ürəkaçan deyil – təmirsiz otaqlar, zamanla köhnəlmiş qapı-pəncərələr, uçulub dağılan tavan və divarlar və s. Evdə aşığın şəxsi əşyaları, səhnə geyimləri, fotoşəkilləri, konsertlərinin afişaları və digər arxiv materiallar var. Bu əşyalar mədəniyyətimiz üçün böyük dəyər kəsb edir və muzey şəraitində mütləq mühafizə olunmalıdırlar.
Qeyd edək ki, Borçalı aşıq məktəbinin bir sıra görkəmli nümayəndələri olub. Onlardan yalnız birinin – Aşıq Kamandarın Gürcüstanda – Marneuli rayonunun Kəpənəkçi kəndində ev-muzeyi yaradılıb. 2021-ci ilin iyulunda açılan mədəniyyət ocağı Türkiyənin Əməkdaşlıq və Koordinasiya Agentliyinin (TİKA) dəstəyi ilə həyata keçirilib.
Ümid edirik ki, aşıq Hüseyn Saraçlının da ev-muzeyinin yaradılması istiqamətində müvafiq işlər aparılacaq. Muzeyin yaradılması görkəmli aşığın xatirəsinə ehtiram göstəricisi ilə yanaşı Gürcüstanda Azərbaycanın mədəni irsinin qorunması, təbliği və gələcək nəsillərə ötürülməsi istiqamətində mühüm addım olacaq.
_____________________
Fotoları Aziz.ge-yə aşıq Nargilə Mehtiyeva təqdim edib.
Aziz.ge
