Azərbaycanın Xalq şairi, tərcüməçi Nigar Rəfibəylinin (1913-1981) yaradıcılığında zərif məhəbbət lirikası, analıq, təbiət və Vətən mövzuları üstünlük təşkil edir.
Onun gürcü ədəbiyyatından etdiyi tərcümələr arasında tanınmış şair Qriqol Abaşidzenin (1914-1994) “Vətən” adlı şeiri xüsusi yer tutur.
Aziz.ge həmin şeiri təqdim edir.
Vətən yalnız dağlar, dərələr deyil,
Vətən qəlbimizdə yanan atəşdir.
Vətən azadlıqdır, vətən ümiddir,
Vətən üzümüzə doğan günəşdir.
***
Dilində vətənin müqəddəs adı,
Vətənçin ölümə gedir igidlər.
Vətənin eşqiylə yaşayıb ölmək –
Budur insan üçün ən böyük hünər.
***
Məni vətənimdən ayıra bilməz,
Gurlasa başımın üstündə tufan.
Köksümün içində çırpınan ürək,
Vətənin eşqiylə vuracaq hər an…
Həmçinin oxu: Nigar Rəfibəylinin Akaki Tseretelidən tərcüməsi – “Xəncər” şeiri
