Azərbaycanın dahi bəstəkarı Üzeyir Hacıbəylinin dünya şöhrətli “Arşın mal alan” operettası Batumi Dram Teatrında gürcü dilində səhnələşdirilib.
Aziz.ge xəbər verir ki, bu barədə Azərbaycanın Batumidəki Baş konsulluğunun məlumatında bildirilib.
Aprelin 2-də tamaşanın premyerası olub. Gürcüstanın məşhur aktyorlarının yer aldığı səhnə əsərini tamaşaçılar alqışlarla qarşılayıblar.
Tamaşanı Azərbaycanın Batumidəki baş konsulu Fuad Əzizov ilə yanaşı yerli hakimiyyət orqanlarının, KİV və ictimaiyyət nümayəndələri, eləcə də Acarıstanda yaşayan Azərbaycan vətəndaşları və soydaşlarımız izləyiblər.
F.Əzizov çıxış edərək Üzəyir Hacıbəylinin həyat yolu və yaradıcılığı, həmçinin operettanın tarixçəsi barədə danışıb. O, təşkilatçılara və teatrın kollektivinə Azərbaycanla Gürcüstan arasında mədəni əlaqələrin möhkəmlənməsinə verdikləri töhfəyə görə təşəkkürünü bildirib.
