Azərbaycanın Xalq şairi Nəriman Həsənzadənin Gürcüstan mövzusunda qələmə aldığı bir neçə şeiri var. Onlardan biri “Məhəbbət” adlanır və 1972-ci ildə Tbilisidə yazılıb.
Poeziya nümunəsində Gürcüstan təbiəti, azərbaycanlılarla gürcülərin dostluğu, gürcü qonaqpərvərliyi təsvir olunub.
Aziz.ge həmin şeiri təqdim edir:
Kür çayından, Araqvadan ötürdülər,
Bizi qədim Mitsxetiyə gətirdilər.
Gül verdilər, gül içində itirdilər.
Can bir oldu, dil bir oldu, söz bir oldu,
Səhər idi.. axşam saat düz bir oldu.
***
Məbəd gördük – dağ yanında bir dağ idi,
Yazı gördük – eramızdan qabaq idi.
Gözümüzdə maraq başqa maraq idi,
Şəkillərdə birləşəndə göz bir oldu,
Sinələrdə od bir oldu, köz bir oldu.
***
Qədim qanlı davaları xatırladıq,
Səbuhitək babaları xatırladıq.
Neçə doğma havaları xatırladıq,
kaman dindi, çonqur dindi, saz bir oldu,
elə bildim, hamısında səs bir oldu.
***
Kinto gəldi qarmonunu çala-çala,
şərab gəldi, buynuz vurduq, bala-bala.
Gürcülərə meylimizi sala-sala,
sağlıq dedik, süfrələrdə tost bir oldu,
mən bir deyim, siz deyin ki, yüz bir oldu.
***
Yola düşdük, yol bir oldu, iz bir oldu,
tək şeirimdə imzam ayrı…
Hiss bir oldu.
