Bu gün Azərbaycanın Xalq şairi Fikrət Qocanın (1935-2021) anım günüdür. O, 2021-ci ilin mayın 5-də 85 yaşında vəfat edib.
F.Qocanın Gürcüstana həsr etdiyi “Gürcü dostum”, “Xevsur oğlanın qarğışı”, “Gürcü sağlığı” adlı şeirləri də var. Poeziya nümunələri 1973-cü ildə qələmə alınıb.
“Gürcü dostum” şeirini təqdim edirik:
Xatirinə dəysə biri
Nə davaya dartınar o,
Nə də pərt olub sınar o,
Nə qorxub çəkilər geri,
Zarafata sala bilər.
Yas içində olsa əgər,
Qapısından qonaq baxa,
“Genasvali, buyur”, – deyər,
Gözündən yaş axa-axa,
Zarafata salar, gülər.
Heç zaman baş əyməz yada,
Heç zaman qısmaz səsini.
Özü üç gün ac olsa da,
Dostuyla son tikəsini
Zarafata salar, bölər.
Gürcünün kefi kök olar –
Qonağı, çaxırı bolsa,
Dost yolunda gürcü dostum
Yeri düşsə, lazım olsa,
Zarafata salar, ölər.
