Gürcüstan və Rusiyanın Xalq artisti Ariadna Şengelayanın bu gün 88 yaşı tamam olur. Gürcüstan və sovet kinematoqrafiyasının ən gözəl aktirsalarından biri 1937-ci ilin yanvarın 13-də Daşkənddə anadan olub.
Müasirlərinin “sovet kinematoqrafiyasının qrafinyası” adlandırdığı A.Şengelaya bir neçə Azərbaycan filmində də baş rollarda çəkilib. O, “Romeo mənim qonşumdur” filmində Nona, “Bizi bağışlayın” filmində Klara, “Ən vacib müsahibə” filmində isə Səidə kimi parlaq obrazları ilə azərbaycanlı kinosevərlərin yaddaşında iz qoyub.
Ümumittifaq Dövlət Kinematoqrafiya İnstitutunun (VQİK) məzunu olan A.Şengelaya kinoaktrisa karyerasına tələbə olarkən başlayıb. 1957-ci ildə “Yekaterina Voronina” melodramında İrina Lednyova obrazı ona uğur gətirir. Bir ildən sonra “Yevgeni Onegin” filmində əsas rolu — Tatyana obrazını yaratmaqla kino ulduzuna çevrilir. Film-operadakı işinə görə o, Moskva və Kiyev festivallarında mükafatlara layiq görülüb.
Aktrisanın filmoqrafiyasında 40-dan çox ekran əsəri yer alıb. O, Tbilisidəki A.S. Qriboyedov adına Rus Dram Teatrının səhnəsində də yaddaqalan obrazlar yaradıb.
A.Şengelaya 2003-cü ildən aktrisa kimi fəaliyyət göstərmir. Karyerasını başa vuran aktrisa Tbilisi Teatr Universitetində aktyorluq və səhnə danışığı üzrə müəllim kimi çalışıb.
Aktrisa Tbilisidə böyük ailəsinin, nəvə-nəticələrinin əhatəsində yaşayır. 2007-ci ildən efirlərdə və ictimaiyyətdə görünmürdü. 2020-ci ildə isə aktrisa 83 yaşını qeyd etdiyi gündə Tbilisidə Rustaveli kinoteatrının qarşısında ulduzunun açılış mərasimində iştirak etmişdi. Həmin il Gürcüstanın o zamankı prezidenti Salome Zurabişvili A.Şengelayanı “Şərəf” ordeni ilə təltif edib.
Qızlıq soyadı Şprink olan aktrisa iki dəfə ailə qurub. İlk həyat yoldaşı gürcü kinorejissor Eldar Şengelaya, ikincisi isə İqor Kopçenko olub. Birinci evlilikdən onun iki qızı var.
Aziz.ge
